L'asturianu va sentise na prestixosa universidá inglesa esta selmana
El presidentre d'Iniciativa pol Asturianu, Inaciu Galán, periodista y escritor, va dar una conferencia na Universidá d'Oxford, n'Inglaterra, el próximu xueves 20 de marzu, y dientro del marcu del XVI Forum for Iberian Studies. Embaxo'l títulu "L'asturianu: l'anomalía d'una llingua non oficial nun estáu plurillingüe", Galán va esplicar a los presentes, alumnos y profesoráu de la Faculty of Medieval and Modern Languages de la Universidá d'Oxford, asina como a espertos en llingües ibériques del mundu enteru, la situación llegal del asturianu, como llingua ensin reconocimientu del estatus d'oficialidá, apurriendo casos de discriminación y un repás a la hestoria de la situación llegal del asturianu, sobre manera nos trenta años últimos.
La conferencia, a la que va dase llectura n'asturianu na Taylor Institution, con una torna en papel al inglés pa les persones que nun seyan a siguila nesti idioma. Ente los conferenciantes presentes nel XVI Forum for Iberian Studies que se celebra nesta prestixosa universidá fundada nel añu 1096, tarán espertos d'universidaes europees y d'otros países pa falar de la hestoria, la situación y les característiques de les llingües que se falen na Península Ibérica.
