 13.13.07.png)
Tres el conceyu con miembros d'Iniciativa pol Asturianu y el Conceyu Universitariu pol Asturianu del Defensor Universitariu, Ramón Durán Rivacoba, ésti fizo llegar al Rector de la Universidá d'Uviéu, Vicente Gotor, una carta con delles reclamaciones y recomendaciones alredor de la situación de la llingua asturiana na instutición asturiana. Esto asocedió dempués del casu de marxinación sufríu por un alumnu a finales del añu pasáu, cuando una funcionaria-y facía llegar l'alvertencia de que nun presentare más documentos n'asturianu nel rexistru de la Universidá, lo que contradiz la norma actual, que reconoz esti drechu a tolos miembros de la comunidá universitaria.
La carta remitida pol Defensor Universitariu inclúi cinco puntos alredor de la situación del asturianu na Universidá d'Uviéu, que busquen evitar casos como'l sufríu por esti alumnu, al que pidió disculpes tanto'l Decanu de Formación del Profesoráu, como'l Defensor. Nel primer puntu recuérdase al Rector la necesidá de camudar el Reglamentu de presentación de documentos nel Rexistru acordies colo qu'ordenó en sentencia firme del Tribunal Superior de Xusticia d'Asturies, en 2010, declarando insuficiente, acordies cola Llei d'Usu y Promoción del Asturianu la regulación que facía l'equipu rectoral. El Defensor reclama que nun se diferencie ente tipos d'escritos al reconocer el drechu a presentalos n'asturianu énte la Universidá. Acordies cola sentencia, recuerda Rivacoba, pueden presentase tou tipu de documentos n'asturianu nel rexistru de la Universidá d'Uviéu.
El Defensor recuerda que la falta d'oficialidá fai que'l funcionariáu nun tenga la obligación de conocer l'asturianu, polo que reclama al Rector que renueve'l conveniu cola Conseyería de Cultura pa la traducción de testos, cuando seya necesario, asina como recomienda la formación del personal n'aplicación del sentir xeneral de la Llei d'Usu pa faver vidable'l drechu de la comunidá universitaria a usar l'asturianu.
Dende Iniciativa pol Asturianu felicitamos al Defensor Universitariu por estes solicitúes feches al Rector y aprovechamos pa recordar los munchos incumplimientos que vien acumulando Vicente Gotor no que cinca a los pasos que firmó col Conceyu Universitariu pol Asturianu pa dar a lo llargo del so mandatu actual: llogotipu billingüe pa la Universidá d'Uviéu, reglamentu pa la rotulación d'instalaciones n'asturianu y otres cuestiones que tendríen que se tener puesto en marcha acordies colos plazos firmaos por Gotor.
