La Xunta Direutiva d'Iniciativa pol Asturianu aconceyó de forma ordinaria en Xixón el pasáu sábadu 21 de xunetu. L'aconceyamientu sirvió pa facer repás de les actividaes y campañes entamaes a lo llargo de los meses pasaos. Aprobóse la celebración d'un conceyu cola Asociación de Trabayadores de Normalización Llingüística pal mes d'agostu, asina como la presencia en dellos actos y celebraciones, ente les que destaca la Universidá Asturiana de Branu de l'ALLA, onde se celebrarán delles actividaes.
Alcordóse tamién la xestión d'un espaciu como primer sede física de la organización, la puesta en marcha d'un plan pa rematar los detalles caberos de la páxina web de la organización, qu'enantes de finales d'añu dexará de tar na so versión beta pa ufrir una versión rematada dafechu.
Ente les decisiones adoptaes ta'l nomamientu como Ayalgueru en funciones d'Esteban Prado Tuñón, en sustitución d'Ana María Viesca Iglesias, que dexa les sos funciones por motivos de salú. Asinamesmo, la socia María del Mar Fernández Vega asume la xestión del ficheru de socios.
