Cristina Coto, vocera de Foru Asturies na Xunta Xeneral d'Asturies, recibió nel parllamentu al presidente d'Iniciativa pol Asturianu, Inaciu Galán, esti miércoles 9 de xunetu, nun conceyu concertáu pa falar cola diputada represenante del grupu de Foru alredor de la presencia del asturianu na nueva llei de la RTPA, asina como d'otres cuestiones d'actualidá que cinquen a la presencia de la llingua asturiana nel sistema educativu o nos prespuestos de 2015.
Iniciativa pol Asturianu pidió a Foru felicitó a Foru poles sos enmiendes al proyectu de llei de la RTPA pa garantizar una mayor presencia del asturianu na radiotelevisión pública, refugaes pol bloque formáu por PP, PSOE y UPYD, del que Cristina Coto esplicó "paecen tener fobia hacia la llingua asturiana". Coto comprometióse a defender estos cambeos na llei, anque esplicó que les mayoríes parllamentaries diben facer mui difícil la so aprobación.
Falóse tamién de la necesidá de conocer más a fondu los recortes anunciaos nes ayudes a la promoción del asturianu nel ámbitu cultural, asina como sobre la recién polémica alredor de l'asignatura d'asturianu en primaria. Coto esplicó que Foro "nun quier que s'enfrente al asturianu con llingües estranxeres sinón que se busques horariu pa introducir otra llingua, nunca nel mesmu horariu que l'asturianu". Una postura que va esplicar, según se comprometió con Iniciativa pol Asturianu, al traviés d'un documentu que va facer llegar tanto a la entidá, como a los sindicatos de la enseñanza.
El conceyu sirvió p'abrir pontes de diálogu ente les dos entidaes de cara a poner en marcha iniciatives nel parllamentu asturianu, y forma parte de los contactos habituales que lleva alantre Iniciativa pol Asturianu con tolos partíos políticos.
