Iniciativa pol Asturianu celebró dos actos el pasáu 28 de febreru n'Uviéu col envís de promocionar la lliteratura asturiana y facer homenaxe a la figura del escritor, clásicu de les Lletres Asturianes, Xuan María Acebal, del qu'esti 8 de marzu van cumplise 200 años del nacimientu.
A les 11 hores nel Cementeriu d'El Salvador d'Uviéu celebróse esti Homenaxe a Acebal, nel que se lleeron poemes del autor y hebo unes pallabres alredor de la so figura per parte d'Inaciu Galán, presidente d'Iniciativa pol Asturianu, y Javier Cubero, investigador de la obra d'Acebal. L'actu celebróse xunto al llugar onde descansen los restos, d'Acebal no que quixo ser un homenaxe a la lliteratura asturiana, énte l'escaezu de les autoridaes culturales d'Asturies, y cuntó cola participación de representación de los descendientes del autor de 'Cantar y más cantar'.
#LlibrosPorPallabres
Darréu instalóse un puestu infomativu d'Iniciativa pol Asturianu na Plaza La Escandalera d'Uviéu con una 'Muria de les pallabres' na que se convidaba a los ciudadanos a compartir con nós les sos pallabres n'asturianu preferíes, regalándo-yos un llibru en llingua asturiana como forma d'afalar la llectura y la lliteratura asturiana. Cientos de persones compartieron les sos pallabres ya interesáronse pola situación del asturianu y el trabayu de la organización, a la que se sumaron dalgunos socios nuevos.
Iniciativa pol Asturianu fai una valoración mui bona de la repercusión d'esto actos, que cuntaron con una bona cobertura de los medios de comunicación y cola bona receptividá de los asturianos y asturianes que pasiaben nel meudía del sábadu peles cais d'Uviéu.
Reportaxe de la TPA sobre los actos
