Ufrimos equí 'Asturies dende otru puntu de vista', artículu d'opinión de Xosé B. Álvarez, vocal de Rellaciones Esteriores d'Iniciativa pol Asturianu. Un artículu nel que fai comparanza ente la situación de les llingües y de la política nel Reinu Xuníu y n'Asturies.
ASTURIES DENDE OTRU PUNTU DE VISTA
Nesti últimu mes, Asturies vien revolucionándose una y otra vuelta col tema de si les formaciones polítiques emerxentes van puxar por reconocimientu llegal del idioma asturianu o si, como della xente piensa, van adoptar la mesma postura que los partíos que lleven decidiendo'l futuru de los asturianos nes caberes cuatro décades.
La polémica vieno por mor d'unes declaraciones d'una representante llocal de Podemos, onde esponía comentarios alto criticables haza los catalanes y que daba una visión inalmisible de la llingua asturiana. Nun tardaron tampoco n'asoleyase les declaraciones de David Ripa, perconocíu candidatu de la mesma formación al Principáu, que falaba del asturianu como si d'una atracción turística se tratare, con frases bien conocíes yá ente l'activismu llingüísticu.
Paez ser, una vegada más, que la mención de la llingua nun vuelve tener más propósitu que'l de posicionase en función de la rentabilidá política nunes eleiciones bien próximes, y nuevamente l'incomprensible mieu a perder una migaya de votos fai que formaciones prometedores consideren qu'un drechu fundamental de la ciudadanía, da-y un estatus oficial al so idioma, haya que lu evaluar y sondiar primeru.
Hai menos d'un añu, ensin presión eleutoral dala, ensin responder al pruyir d'una mayoría de votantes, ensin siquier ser una midida que munchos queríen, el Parllamentu británicu reconocía a Cornualles como una minoría nacional estremada d'Inglaterra. Un pasu dau per un Parllamentu con mayoría conservadora y nun país que previamente ñegare esi reconocimientu a un pueblu hestóricu en Gran Bretaña.
Los representantes de la ciudadanía han tener valor, xuiciu y concenxa de les sos aiciones, y cuando falamos d'un drechu fundamental sobren les entrugues. Lo correuto, la única midida posible, ye'l reconocimientu llegal d'esi drechu. Valió yá de pallabres baleres, valió de parches llegales y d'ambiguedá. Los representantes del pueblu británicu yá cumplieron pa cola so ciudadanía. ¿Reconocerán los nuevos representantes del pueblu asturianu el drechu fundamental a declarar l'asturianu oficial? Solo cabe una rempuesta. ¡Asuman la so responsabilidá!
