Aconceyamientu d’Iniciativa pol Asturianu con N’Ast

Espublizao 22/12/11

El naciente colectivu Iniciativa pol Asturianu aconceyó con un representante de l’Asociación Cultural N’Ast. Nel conceyu analizóse tanto l’actual situación del movimientu de reivindicación llingüística, y abriéronse pontes de comunicación y futura collaboración ente les dos organizaciones.

N’Ast como asociación que trabaya l’ámbitu xeneral de la cultura asturiana dende la perspectiva de la construcción nacional, ya Iniciativa pol Asturianu como una entidá que va lluchar pola normalización del idioma asturianu asumiendo les sos implicaciones sociales ya identitaries, representen dos proyectos diferentes pero compatibles a nivel tácticu.

Dambes organizaciones celebraron la reactivación del movimientu de reivindicación llingüística y valoraron de forma positiva que se tea na cai llucando por unos drechos humanos imprescindibles como son los derechos llingüísticos, avanzándose asina na xeneración d’un nuevu escenariu que lo mesmo Iniciativa pol Asturianu que N’ast esperen que cada vuelta seya más dinámicu, y onde s’asuma ensin complexos la bayura de sensibilidaes y metodoloxíes organizatives como un fechu positivu evitándose polo tanto cualesquier pretensión vanguardista y monopolizadora alrodiu d’una llingua que ye patrimoniu colectivu del pueblu asturianu.
El conceyu encuádrase dientro de la rolda d’alcuentros que miembros d’Iniciativa pol Asturianu vienen faciendo dende va delles selmanes con colectivos y persones venceyaes al movimientu de reivindicación llingüística asturianu.

Videu destacáu

Protocolu Garantía de los Drechos Llingüísticos

El Protocolu pa la Garantía de los Drechos Llingüísticos ye un documentu internacional que quier ser una continuación de la Declaración Universal de los Drechos Llingüísticos aprobada va agora venti años.