 12.03.16.png)
L’Altu Comisionáu de los Drechos Humanos de la Organización de les Naciones Xuníes (ONX) va conocer de primer mano la situación del asturianu dempués de la ellaboración d’un informe nel qu’Iniciativa pol Asturianu recueye la llamentable situación que vive la llingua y sobre manera, que viven les persones que quieren mandase d’ella nel día a día, chocando con una alministración que los marxina y reprime.
Nun ye la primer vegada qu’una instución internacional sabe del casu del asturianu, y la respuesta siempres ye la mesma. Nenguna institución ye a entender el tratamientu que los propios gobiernos asturianos vienen dando al idioma añu tres añu. El Conseyu d’Europa, la UNESCO… siguen dando l’alerta y reclamando midíes a los gobiernos d’España y Asturies, la situación del asturianu tien que se solucionar con midíes polítiques.
La sociedá evolucionó dende los entamos de l’autonomía asturiana no que cinca a la so visión de la llingua asturiana. Dende aquella sociedá enllena de prexuicios contra la so propia llingua a una situación na qu'ésta, inda viviendo momentos de menor vitalidá, ye percibida pola sociedá ensin conflictu, como un elementu que-y ye propiu y que nun quier que se pierda. La oficialidá nun xeneraría güei nungún problema, sinón que solucionaría los que se dan tolos díes.
Por embargu, y pese a les reclamaciones internacionales, la movilización ciudadana…una parte significativa de la clas política asturiana paez vivir anclada nunes postures que yá naide entiende, desconectada d’una sociedá. Estos díes vimos como una propuesta del Partíu Popular sofitada por UPyD buscaba a les clares facer desapaecer l’asturianu de la educación primaria.
Namás 11 votos a favor los 10 del PP y el d’UPyD, frente a 33 en contra de partíos tan diferentes como FSA-PSOE, Foru Asturies ya Izquierda Xunida. Dalgunes fuercies polítiques paez qu’entamen a cayer na cuenta de que la sociedá asturiana pue nun tener una idea clara de qué hai que facer pa que la llingua asturiana tenga futuru, pero tamién saben distinguir cuando s’ataca a la so cultura y a les sos señes d’identidá.
Trés cuartes partes de la Xunta Xeneral dixeron un NON claru y rotundu, con unes defenses del asturianu clares y bien construyíes. El clima social a favor del asturianu va calando na clas política.
