Cada mes, nel programa radiofónicu Iniciativa pol Asturianu nes ondes emítese un editorial nel que la organización da la opinión sobre cuestiones llingüistiques y reflexona sobre les campañes en marcha, acciones, etc. Reproducimos equí la del mes de setiembre, que fala del momentu de crisis y como dalgunos actores políticos traten d'usala pa dar pasos atrás na normalización llingüística del asturianu.

 

Nel contestu actual de crisis económica y recortes xenerales de presupuestos nun podemos dexar que s’aproveche la situación p’acabar con dellos de los avances, mínimos pero importantes, consiguíos nes décades últimes pa la normalización de la llingua asturiana. 

 

Mientres el Gobiernu d’Asturies, primero con Foru y dempués cola FSA-PSOE, recorten los yá de por si curtios fondos pal asturianu, la falta d’oficialidá del idioma de nueso sigue faciendo que cada añu Asturies pierda decenes de millones d’euros que’l Gobiernu d’España trespasa a les comunidaes con llingües cooficiales pa financiar gran parte de la inversión en materia llingüística. Y eso por nun falar d’otros fondos europeos a los que nun tenemos accesu pola inespiblicable negativa a facer oficial l’asturianu. Son yá más de trenta años perdiendo perres por esta irresponsabilidá de la nuesa clas política, la cantidá perdida suma yá cientos de millones d’euros.

 

¿Tamos en condiciones de refugar fondos que xeneraríen actividá económica y emplegu n’Asturies? Dende Iniciativa pol Asturianu tamos convencíos de que non. En tiempos de crisis l’asturianu nun tien de vese como una carga, sinón como una oportunidá , porque la inversión en normalización llingüística ye rentable, xenera emplegu, caltién un bien cultural, indentitariu y económicu de los asturianos y les asturianes.

 

Los ciudadanos han saber que se ta usando la crisis como escusa p’acabar con dellos de los avances consiguíos pal asturianu nos años caberos, como cuando dalgunos conceyos ponen en dulda la continuidá de los servicios de normalización llingüística, cola escusa d’evitar gastos, cuando la inversión ta financiada al 100% pol Gobiernu d’Asturies. Siguiremos sollertes pa denunciar estos pasos atrás y buscar nueves fórmules que permitan al asturianu avanzar tamién en tiempos de crisis.