UVIÉU 26/03/2012. L’”Ateneo de Cultura y Lengua Guaraní” vien d’unviar una comunicación oficial a Iniciativa pol Asturianu na qu’afirma al traviés del so Direutor Xeneral, David Galeano Olivera, que la institución paraguaya “quier espresar el so incondicional y permanente sofitu y solidaridá na campaña de defensa de la llingua asturiana” que la nuestra organización ta faciendo.

Amás, l’Atenéu afirma na so carta a l’asociación qu’altiende que l’asturianu ye una “valiosa, xenuina y hestórica manifestación de la cultura” d’Asturies y que los sos falantes, responsables del so caltenimientu y tresmisión, “tienen tol drechu del mundu –como drechu humanu y llingüísticu- d’espresase na so llingua llariega”, yá que esta llingua resume la “hestoria y manera de ser de la xente asturiano”.

L’Atenéu, amás, quixo dexar nidiu na so carta a Iniciativa pol Asturianu que, tres facer un siguimientu de la nuestra actividá online y d’informase de la situación de la llingua, la resolución de sumase a esta “gran cruzada” foi “unánime” por parte la institución.

Dende Iniciativa pol Asturianu queremos amosar el nuestru más fondu respetu y almiración haza esta entidá, que defende y promueve la cultura y la llingua guaraní, falada por un 90% la población de Paraguái, amás de ser falada tamien en Brasil, Bolivia y Arxentina. Dende la nuestra organización queremos facer pública la nuestra más fonda simpatía faza esta llingua y cultura, símbolu d’un país tan prósimu al de nuestru por razones hestóriques y sociales, ya que, d’igual mena qu’asocede col asturianu, nun dexa de ser patrimoniu de toos y toes, y nuestra ye la responsabilidá de nun la dexar desapaecer.

L’”Ateneo de Lengua y Cultura Guaraní” ye una entidá autónoma con carácter científicu-cultural y que foi creada como una institución d’educación superior, con rangu universitariu pa “cultivar y esparder la Llingua y Cultura Guaraní”. Foi declarada d’interés cultural educativu pol Viceministeriu de Cultura y desendolca cursos de guaraní y actividaes de promoción cultural en Paraguái.