”Dende Iniciativa pol Asturianu queremos reconocer el so llabor pol idioma y acompañar a la familia nesti momentu triste de la so despidida, faciendo un llamáu pa que la so obra tenga’l reconocimientu de la sociedá asturiana y les instituciones”
MIERES DEL CAMÍN, 13/04/2019. Esti sábadu 20 a los 93 años morría tres una llarga vida que dexa detrás una inmensa obra n’asturianu, l’escritor mierense Julián Burgos Pasucal. L’autor ye quiciabes l’últimu d’una xeneración, los qu’escribieron nel tiempu del Franquismu y trabayaron pol idioma nun tiempu difícil.
El presidente d’Iniciativa pol Asturianu, Inaciu Galán, unvió esta mañana un testu a la familia del escritor nel que reconocía’l llabor fechu por Burgos na difusión del asturianu. Amás, dende Iniciativa pol Asturianu queremos facer públicu’l nuesu reconocimientu y facer un llamáu pa que la so obra tenga’l reconocimientu de la sociedá asturiana y les instituciones.
Julián Burgos ñació ne Mieres del Camín l’1 d’abril de 1926. Doctoráu en Ciencies Económiques y profesional lliberal, dedicó’l so llabor lliterariu al xéneru humorísticu, al traviés del monólogu y la poesía. Formó parte, nos años sesenta del sieglu pasáu, de l’asociación Amigos del Bable, xunto a José León Delestal o Llorienzu Novo Mier, ente otros autores.
Nel so llabor pola llingua asturiana destaca tamién un ficheru nel que s’inclúin más de 150.000 términos n’asturianu, un refraneru con más de 200 fábules n’asturianu, asina como los sos estudios sobre la obra del poeta mierense Teodoro Cuesta. Nel campu lliterariu, llegó a escribir más de 6.500 monólogos, dellos recoyíos nos volúmenes ‘Hailos’, ‘Humor en bable’ y ‘Afayu del Nueu Mundiu”, el monólogu más estensu escritu en llingua asturiana, con más de 5.300 versos. A lo llargo de la so vida ganó dellos premios lliterarios ente los que destaquen el Teodoro Cuesta de Mieres en 1978 y l’Emilio Alarcos Llorach otorgáu pol Aula de Paz ‘Camín de Mieres’ en 2001. Los sos vecinos tamién lu reconocieron otorgándo-y en 2014 la insinia d’oru de los gallardones Miereneses del Añu. El 20 de xunu del 2018 L’Asociación Cultural «Camín de Mieres» fíxo-y un prestosu actu d’homenaxe como reconocencia a tola so trayectoria personal y profesional, y va pocos díes recibía un nuevu homenaxe del Concursu y Muestra de Folclor Ciudá d’Uviéu.
