Iniciativa pol Asturianu va participar esti vienres 6 de mayu cola so pancarta na Manifestación pola #Oficialidá. La organización fai un llamáu a los asturianos y asturianes pa que vuelvan a salir a la cai pa reivindicar la reconocencia del estatus llegal d'oficialidá pal idioma nel Día de les Lletres Asturianes. Cada vegada son más les persones que se sumen a esta reivindicación xusta y que pide la reconocencia de los drechos civiles de tolos ciudadanos.
Iniciativa pol Asturianu ye una organización que ñació pa implicar a tola sociedá asturiana nel procesu de recuperación y normalización del asturianu, y polo tanto camienta imprescindible que la sociedá s’implique y faiga oyer la so voz, que ye mayoritariamente favoratible a que l’asturianu se convierta nuna llingua normal, que pueda usase en tolos ámbitos y que tenga garantizáu’l so futuru, lo que nel marcu llegal actual namás ye posible si esta llingua ye oficial.
Animamos amás a organizaciones sociales, culturales y polítiques a participar de la marcha, demostrando que la posición contraria a la oficialidá del asturianu dificilmente pue defendese dende una postura democrática, yá que supón, non solo la perda d'un patrimoniu cultura ya identitariu importante, sinón la falta de drechos d'una parte de la población d'Asturies.
La Manifestación pola Oficialidá va salir el vienres 6 de mayu a les 19:30 hores de la Estación del Norte d'Uviéu. Animamos a toles persones enfotaes nel futuru del idioma a participar con nós na manifestación convocada pola Xunta pola Defensa de la Llingua Asturiana.
Iniciativa pol Asturianu recuerda dempués de la manifestación va celebrase nel Teatru Campoamor la Xunta Estraordinaria de l’Academia de la Llingua Asturiana y que la entrada ye llibre y de baldre. Animamos a la xente a participar d'esti actu de sofitu al idioma y a la institución.
