Valoraciones de l’asociación énte la faltá de continuidá d’esti serviciu públicu dotáu con insuficientes recursos presupuestarios
UVIÉU, 20/01/2012. La falta de compromisu de los conceyos y la inesistencia d’un conveniu cola Direición Xeneral de Política Llingüística, que dexa en situación de total indefensión a los trabayadores, llevó al pieslle de trés Servicios de Normalización Llingüística –Llaviana, Corvera y Mancomunidá Ozcos-Eo- a los qu’hai que sumar el casu del SNL peslláu n’agostu y a los continuos parones nestos servicios dende’l so nacimientu.
Como nun podía ser d’otra manera, dende Iniciativa pol Asturianu, oponémonos al retrocesu que supón dexar ensin normalización a los conceyos nos que trabayen estos servicios y la consiguiente perda de puestos de trabayu que remanez d’ello.
Los Servicios de Normalización Llingüística (SNL) son los departamentos que desendolquen el trabayu téunicu de cara a avanzar nun consensuáu procesu de normalización del idioma asturianu y del eonaviegu. Un trabayu necesariu, xustu ya ilusionante de fomentu del asturianu y del eonaviegu nun nivel de contautu más direutu cola ciudadanía.
La Direición Xeneral de Política Llingüística tien la obligación y la responsabilidá de cumplir cola normalización llingüística, calteniendo estos servicios, afalando a los conceyos a la estabilidá de los mesmos y faciendo que la Rede llegue al 100% de la población asturiana, ampliando esta rede a los llugares a los qu’agora nun llega.
Dende Iniciativa pol Asturianu pidimos tamién, al igual que los trabayadores, da-y personalidá xurídica propia a la Rede de Normalización Llingüística nos Conceyos, dalgo que facilitaría la coordinación y qu’anguaño esiste únicamente pola voluntá de los téunicos.
