“Oficialidá: el camín constitucional de futuru pal asturianu” foi el lema utilizáu pola organización na manifestación d’esta tarde
XIXÓN, 06/04/2019. Iniciativa pol Asturianu participó na movilización na tarde de güei en Xixón convocada pola XDLA. La organización sumóse a la convocatoria llevando la so pancarta pol consensu constitucional pola oficialidá del asturianu. Amás de directivos y socios d’Iniciativa pol Asturianu, representantes de diferentes fuercies polítiques con representación institucional y que defienden la oficialidá tuvieron nel cortexu de la ONG.
Pa Inaciu Galán, presidente d’Iniciativa pol Asturianu, la presencia d’estos partíos na so pancarta “consiguió dar cuenta de la tresversalidá, la mayoría social y el consensu xeneralizáu qu’axunta la oficialidá de la llingua asturiana y del gallego-asturianu, que toca a partíos de tol espectru políticu”.
Galán dixo que “güei manifestamos y recordamos en Xixón que la oficialidá ye la ferramienta constitucional que va permitir la igualdá de derechos llingüísticos n’Asturies. La oficialidá ye la ferramienta que va facer real el cumplimientu de la Constitución Española, qu’establez la oficialidá pa toles llingües d’España nel so artículu 3.2”. El presidente recordó que “nun val namás con dir a manifestase, hai que dar más pasos, nel día a día de cada persona, nes asociaciones, nes empreses, nes instituciones, defender la oficialidá tien que venir acompañáu de la coherencia d’usar l’asturianu en tolos ámbitos de la vida”.
Pa Iniciativa pol Asturianu “agora ye’l momentu de trabayar pa facer medrar les bases del consensu y sumar a los partíos con representación parllamentaria qu’entá nun tán apoyando l’aplicación del artículu 3.2 de la Constitución española, qu’establez la oficialidá pa les llingües acordies colos estatutos d’autonomía”. La formación vuelve a pidir a PP y Ciudadanos que “reflexonen sobre la so postura, en clara contradicción col so llabor n’otros llugares onde gobiernen y sí apoyen y desarrollen la oficialidá”.
