“Al compartir güei espaciu nesta mesma redonda cola Academia de la Llingua Asturiana, dende Iniciativa pol Asturianu queremos aprovechar pa mostrar el nuesu sofitu más espresu a la institución énte los ataques de la estrema derecha, porque nun val too”
“Güei manifestamos en Xixón que la oficialidá ye la ferramienta constitucional que va permitir la igualdá de drechos llingüísticos n’Asturies”
XIXÓN, 01/03/2019. Inaciu Galán, presidente d’Iniciativa pol Asturianu, participó esta tarde nuna mesa redonda baxo’l título “Oficialidá, una cuestión de drechos” entamada pol movimientu La Rede nel Atenéu de La Calzada de Xixón. Ellí, el presidente de la organización recordó que “nun podemos escaecer que les persones que tamos defendiendo la oficialidá del idioma tamos buscando da-y futuru al idioma y mantener esti patrimoniu llingüísticu a les xeneraciones del futuru”.
Galán dixo tamién que “güei manifestamos y recordamos en Xixón que la oficialidá ye la ferramienta constitucional que va permitir la igualdá de derechos llingüísticos n’Asturies. La oficialidá ye la ferramienta que va facer real el cumplimiento de la Constitución Española, qu’establez la oficialidá pa toles llingües d’España nel so artículu 3.2”.
El presidente de la organización comentó tamién que «va unos meses dende Iniciativa pol Asturianu rexistramos nesti conceyu una declaración institucional en defensa del Serviciu de Normalización énte los ataques d’una fuercia política que foi aprobada por una inmensa mayoría del plenu municipal. Güei, al compartir espaciu nesta mesa redonda cola Academia de la Llingua Asturiana, dende Iniciativa pol Asturianu queremos mostrar el nuesu sofitu más espresu a la institución ante los ataques de la estrema derecha. Pueden defendese toles postures pero ye inalmisible facer acusaciones falses y mui graves contra otres persones o como nesti casu, contra instituciones».
Galán acabó diciendo que “el nome d’esta mesa redonda ye’l resumen de la nuesa reclamación porque de manera clara y cenciella, oficialidá ye sinónimu d’algamar derechos llingüísticos que nun van contra naide sinón que garantiza la igualdá de tola ciudadanía d’Asturies”. Galán quixo tamién esplicar que «nun val namás con dir a manifestase, hai que dar más pasos, nel día a día de cada persona, nes asociaciones, nes empreses, nes instituciones, defender la oficialidá tien que venir acompañáu de la coherencia d’usar l’asturianu en tolos ámbitos de la vida».
