La idea que se pretende dende la organización ye que los asociaos del Centru de Sevilla puedan acceder d’una manera afayadiza a diferentes obres nel idioma maternu
Iniciativa pol Asturianu celebró esti miércoles 26 de setiembre, Día Européu de les Llingües, faciendo entrega d’una donación de llibros al Centru Asturianu de Sevilla onde a partir d’agora los asociaos podrán consultar diferentes llibros n’asturianu.
La idea que se pretende dende la organización ye que los asociaos del Centru de Sevilla puedan acceder d’una manera afayadiza a diferentes obres nel idioma maternu. La donación incluye diferentes obres lliteraries (sobre manera poesía y novela), llibros d’ensayu amás de materiales pa neños.
Dende Iniciativa pol Asturianu consideramos importante que la llingua asturiana tenga una presencia importante nestos llugares ya que consideramos que cuntar con un espaciu pal asturianu va facer que los ciudadanos que nun tán n’Asturies puedan siguir teniendo presente la llingua de los sos antepasaos. Dende la organización tamién pretendemos a traviés d’esta acción cultural xenerar un espaciu pa favorecer la conocencia del idioma y que la sociedá sepa cuála ye la so situación.
Dende Iniciativa pol Asturianu amosamos el nuesu agradecimientu pola disposición p’acoyer esta biblioteca al Centru Asturianu de Sevilla y animamos al conxuntu de los asociaos a facer usu d’estos llibros y a disfrutar con la literatura asturiana.
