Cada mes, nel programa radiofónicu Iniciativa pol Asturianu nes ondes emítese una editorial na que la organización da la opinión sobre cuestiones llingüistiques y reflexona sobre les campañes en marcha, acciones, etc. Reproducimos equí la del mes de xunetu.

 

Iniciativa pol Asturianu cumplió yá seis meses d’actividá pública. Mediu añu nel que tamos satisfechos pol trabayu fechu, sabedores de qu’entá nun ficimos más qu’entamar. El camín ye llargu. Pela mio parte, satisfechu col trabayu de la directiva y de munchos socios de la organización y collaboradores que vienen faciendo un trabayu discretu pero efectivu pa que l’asturianu siga dando pasos empobináu a un futuru meyor.

 

Esti mes de xunu entregábemos na sede de la Real Academia Española en Madrid un informe avaláu por llingüistes d’universidaes del mundu enteru pa solicitiar a esta institución que l’asturianu dexe de considerase dialectu nel so diccionariu.

 

Esti que ye un pasu pequeñu, pero perimportante pola repercusión del diccionariu d’esta academia, ye pa nós una manera d’entamar la casa pelos cimientos. Pa recuperar y facer medrar el prestixu d’una llingua, lo primero ye tener la consideración de los sos falantes y de les instituciones más cercanes.  Nesti camín ye imprescindible una reconocencia ensin complexos per parte de l'Academia española. Taremos sollertes a la respuesta de la RAE.