Esti llunes 18 y convocaos pol partíu Foru Asturies, representates d'Iniciativa pol Asturianu, aconceyaron con miembros de la formación n'Uviéu. Nel actu los representantes de Foru esplicaron el so programa en materia de política llingüística incluyendo delles apreciaciones sobre la inclusión de la oficialidá como promesa electoral per primer vegada pa esta formación.

Dende Iniciativa pol Asturianu felicitóse a la formación por sumase a la defensa nel cambiu del estatus del idioma n'Asturies pidiendo a la formación qu'esa defensa tenga una aplicación real dientro del propiu partíu. Pa Iniciativa pol Asturianu les formaciones que defenden la oficialidá han facela oficial dientro de la organización a tolos efectos, asina como trabayar en midíes previes y posteriores a la oficialidá, asina como tomar midíes de normalización naquellos llugares onde gobiernen, pa demostrar el so compromisu real cola llingua.

El conceyu encóntase dientro de los alcuentros qu'Iniciativa pol Asturianu tien davezu con formaciones polítiques pa trabayar nun consensu a favor del asturianu, mesmo en campaña como a lo llargo de les llexislatures.