'Ai, la falta d'autoestima' ye un artículu d'Inaciu Galán, presidente d'Iniciativa pol Asturianu, asoleyaba esti artículu va unos díes nel diariu El Comercio, en respuesta a otra opinión asolayada díes atrás. Ufrimos l'artículu agora na nuesa páxina.
Ai, la falta d’autoestima
Julián Bárcena esplicaba esti domingu n’EL COMERCIO les sos duldes sobre la importancia de la decisión del ministru Wert de denegar la especialidá d’asturianu al profesoráu. Munchos colectivos esplicamos yá cómo pasar d’un cuerpu de profesores interinos a un profesoráu coles mesmes obligaciones que’l restu, pa la dignidá y la calidá de la enseñanza del asturianu.
Sicasí, lo que más llamaba l’atención del so artículu yera ensin dulda un habitual discursu contradictoriu que se da en munchos asturianos. Esti nel que tamos mui arguyosos de lo propio, pero nel que, al mesmu tiempu, l’asturianu y la cultura asturiana, en llugar de ser una riqueza, paecen ser una especie de carga pesada que mos fai tar condergaos a escoyer ente apegamos a los nueso o salir al mundu, como si les dos opciones fueran contradictories y non complementaries.
Esta visión esplícase na falta d’autoestima que tenemos los asturianos y que siempres pensé ye culpable n’altu grau de la situación llaceriosa d’Asturies. Pensamos que nun somos quien a salir de les dificultaes económiques, que ye normal que la mocedá tenga que marchar fuera a trabayar, y yá mos convencieron de qu’esto ye inevitable. Pensamos que la nuesa llingua nun val pa nada, anque la usemos a diariu. Convenciéronmos de que nun podemos facer nada, porque somos pocos nun mundu globalizáu y amás, poco capaces, con circunstancies adverses irremediables en contra.
Pero l’asturianu preséntase como una oportunidá nesta situación. Porque ye unu de los elementos imprescindibles, el más relevante de los que mos configuren como pueblu. Y ye una ferramienta pa romper con esa visión d’una decadencia ensin remediu d’Asturies.
Porque mientres sigamos sintiendo vergoña de falar asturianu ye mui difícil que podamos dexar de ver como irremediable la sangría de talentu mozu, la perda de la nuesa cultura, la enorme inorancia que tenemos de lo propio, la falta d’enfotu na capacidá d’Asturies pa ser próspera. L’usu del asturianu ayuda a ganar autoestima, ye un elementu que xenera empléu y riqueza, un atractivu turísticu, cultural y sobre too, la forma na que los asturianos vemos el mundu.
Son munchos los estudios que demuestren la mayor facilidá de los alumnos qu’usen dos llingües na so vida diaria pa deprender otres. Non, Julián, si los asturianos nun deprendemos bien inglés nun ye porque nes escueles haya una asignatura optativa con hora y media d’asturianu a la selmana. Otros sistemes educativos que dediquen más tiempu a la llingua propia tienen meyores resultaos coles llingües estranxeres. Nun va perhí la cosa.
Despreciando lo propio, y reprimiendo l’usu del asturianu, evitando l’accesu de los asturianos a la so propia llingua con normalidá nes escueles, llegamos a l’Asturies que tenemos, con tolos sos problemes y esos desafíos ensin solucionar a los que se refier Bárcena nel so artículu. ¿Por qué nun probar otru modelu? A ver qué pasa si recuperamos el nuesu autoestima, si mos queremos a nós mesmos un pocoñín más. A otros que lo ficieron paez que nun-yos va tan mal.
Inaciu Galán y González
Presidente d’Iniciativa pol Asturianu
