Iniciativa pol Asturianu axunta nuna pancarta a representantes de partíos nel consensu constitucional pola oficialidá

Publicado 5/3/18

La ONG Iniciativa pol Asturianu va participar un añu más na Manifestación pola Oficialidá del Día de les Lletres Asturianes, que convoca la Xunta pola Defensa de la Llingua Asturiana y que va salir el vienres 4 de mayu a les 19:30 hores de la Estación del Norte d’Uviéu, na cai Uría.

 
Nesta ocasión, y acordies col contestu actual, nel que se tien de construyir un modelu d’oficialidá y siguir afitando’l consensu social y de partíos pola oficialidá, Iniciativa pol Asurianu va dexar l’espaciu na so pancarta “Oficialidá, el camín constitucional de futuru pal asturianu”, a representantes de los cuatro partíos presentes nel parllamentu que nesti momentu defenden que l’asturianu precisa l’estatus d’oficialidá: FSA-PSOE, Podemos, Izquierda Xunida y Foro. Cargos públicos, orgánicos y militantes d’estes formaciones garraran la pancarta amosando la tresversalidá y consensu xeneralizáu qu’axunta la oficialidá de la llingua asturiana y del gallego-asturianu.

 
Pa Iniciativa pol Asturianu agora ye’l momentu de trabayar pa facer medrar les bases del consensu y sumar a los partíos con representación parllamentaria qu’entá nun tán apoyando l’aplicación del artículu 3.2 de la Constitución española, qu’establez la oficialidá pa les llingües acordies colos estatutos d’autonomía. Ye por ello que volvemos a pidir a PP y Ciudadanos que reflexonen sobre la so postura, en clara contradicción col so llabor n’otros llugares onde gobiernen.
 
Agora ye’l momentu de que los partíos trabayen xuntos y en collaboración colos colectivos sociales espertos en drechos llingüísticos na construcción del modelu d’oficialidá que precisa Asturies. Iniciativa pol Asturianu celebró nel mes de marzu un seminariu nel que pudieron sentise les voces d’espertos n’educación, cultura, xuristes y economistes, alredor de la oficialidá, y agora queremos siguir aportando’l nuesu granín d’arena na construcción de la oficialidá, axuntando a les formaciones que defenden la oficialidá nuna sola pancarta de la manifestación.
 
Iniciativa pol Asturianu quier amás animar a tola sociedá asturiana a sumase a la manifestación y a participar nel actu del Día de les Lletres Asturianes que celebra l’Academia de la Llingua Asturiana de siguío nel Teatru Campoamor.

Videu destacáu

Protocolu Garantía de los Drechos Llingüísticos

El Protocolu pa la Garantía de los Drechos Llingüísticos ye un documentu internacional que quier ser una continuación de la Declaración Universal de los Drechos Llingüísticos aprobada va agora venti años.